火燄理論上係人類最好嘅朋友，事關人類文明從懂得生火開始，如果原始老祖宗唔識得鑽木取火，大家可能仍然過着茹毛飲血嘅穴居生活。之不過問題係，火燄同時又係對人類最危險最可怕嘅宿敵，萬一唔覺意發生火災場面失控，隨時引起大災難。
火災嘅慘痛經驗大家見過唔少啦，遠嘅有彌敦道嘉利大廈燒到慘不忍睹，近嘅就有花園街劏房燒到死傷枕藉，證明火燄呢家嘢絕對不容輕視，消防工作唔能夠有片刻鬆懈，否則一不留神隨時死得人多。
好嘞，假如有人向消防處舉報，某個地方嚴重違反消防條例，有機會引發後果堪憂嘅大災難，消防處應該點做呢？正常而言當然係果斷執法啦，偏偏事實唔係咁樣喎，消防處實在令人費解，佢哋明知有人涉嫌違例都唔去執法喎，問你服未！
功夫茶所講嘅某個地方，其實係深水埗福華街一幢舊樓，有住客一年前已經發現問題多多，梯間滿布雜物啦，滅火筒又過期啦，若然發生火警都唔知點逃生，滅火筒九成已經失去滅火作用。
本報記者去到實地視察，發現從天台到地下嘅梯間都塞滿各式各樣嘅雜物，大型家具又有，手推車又有，單車都有，地下嘅逃生大門更加被床褥堵塞，即使強行跨過雜物，推開鐵門仍然被木櫈擋路。此外咯喎，記者抽查滅火筒，發現有效日期早於○五年屆滿，梯間亦欠缺逃生照明燈，日間尚且要用電筒照明，夜晚簡直係伸手不見五指。你話嘞，盲舂舂摸黑逃離火災現場，就算唔燒死或者焗死，都有可能仆死或者踩死啦，吓話！
消防處發言人證實，今年一月份四次巡查，都發現呢一幢舊樓嘅梯間有雜物，涉嫌違反《消防（消除火警危險）規例》，不過未能尋獲雜物負責人，所以無法即時採取執法行動。
喂喂喂，大佬呀，未能尋獲雜物負責人就唔執法？有冇荒謬啲呀！假如雜物負責人移咗民或者失咗蹤，莫非消防處永遠唔去想辦法清除雜物？家陣講緊十萬火急人命關天喎，執法者懶得執法等於草菅人命，好大鑊！
審計署冇耐之前發表報告，踢爆消防處弄虛作假，處方聲稱過去兩年處理消防安全投訴百分百達標，根本唔係事實。審計報告又揭露消防處積壓未完成處理嘅投訴超過一千五百宗，最嚴重拖延四百幾日，又懶理有樓宇一年內警鐘誤鳴超過一百次，反映消防處高層管理不善。即係咁，唔該消防處唔好再選擇性執法嘞，以免害死人呀！