現屆政府上場後加大力度推動消滅廚餘工作，環境局局長黃錦星尋日宣布大計，目標係二○二二年減少四成廚餘，並發表「香港廚餘及園林廢物計劃二○一四至二○二二」報告，除咗親自上陣力銷大計，政府問責官員要幫手喺報告中撰寫獻詞支持。不過，財經事務及庫務局局長陳家強就疑似搞錯廚餘數字，認真老貓燒鬚。
陳家強喺獻詞中話，香港呢個繁忙城市，每日產生九千噸都市固體廢物，其中廚餘約佔四成共三千九百噸，相當於二百五十架雙層巴士重量，以此呼籲大家齊響應減少廚餘。不過，有人心水清發現，陳家強嘅廚餘數字同環境局提供嘅資料有出入，環境局指港人每日共丟棄約三千六百噸廚餘，換言之陳家強講多咗三百噸廚餘。
話時話，陳家強做得財經事務工作，理應對數字極之敏感，今次疑搞錯廚餘數字，究竟係佢未卜先知未來嘅廚餘數字，定係純屬手民之誤呢？