政情：律政司搬竇好睇唔好食
自從古物諮詢委員會（古諮會）前年通過將中環舊政府總部西座評為一級歷史建築，被稱為「政府山」嘅前中區政府合署中座、東座及西座，三幢大樓已一併移交律政司，打造香港法律地標，而律政司部分辦公室更有望趕及明年夏天前，率先進駐中座及東座。
不過，原來「細屋搬大屋」依然有人唔歡喜，消息指三幢大樓「好睇唔好食」之餘，想話有私家飯堂食晏嘅地方都冇，更莫講話煙民同事想搵地方「抖氣」。
近三十年來，律政司辦公室一直散落金鐘道政府合署同附近三幢私人商廈，除咗承擔貴租，對律政司資源調配亦非常不便。
古蹟規範多多
所以，政府將舊政總西座一併撥歸律政司，不但可以集中律政司轄下各部門，仲有地方預留畀海牙國際司法會議，以及同法律相關嘅非政府機構使用。
不過，政府山三幢大樓話明係一級歷史建築，內部建築可改動嘅地方唔多，好似中座嘅行政會議廳及其連接正門大堂嘅大理石樓梯，就連樓梯對開嘅「扑咪」位都一律不得改裝，作為辦公室用途可謂「好睇唔好食」。據知律政司想倣效立法會會議廳外嘅歷史長廊咁，想喺律政司照辦煮碗設一個亦難以成事。
消息又指，公眾監察政府對公帑嘅運用愈來愈嚴厲，律政司為咗將呢塊原屬中環甲級寫字樓嘅地皮物盡其用，加上低價平租予飲食集團喺律政司內經營餐廳肯定招人話柄，決定索性不設飯堂，預料律政司正式遷入政府山後，午飯人流勢必逼爆本來已經插針不入嘅中環。
而隨着政府部門實施全面禁煙，唔少煙民律師煙癮起，分分鐘要走出中座閘外先可以「抖抖氣」，食支煙都要競步來回先趕得切返上樓做嘢。
職員要挾唔撈
唔單止咁，以往喺金鐘道政府合署，律政司律師要到高等法院出庭，只係落樓行過隔籬就到，但搬入政府山後就肯定再冇呢支歌仔唱。據知內部有人對此有微言，要求律政司安排穿梭巴士往返高院，甚至要挾辭職賴死唔搬。律政司未入伙，同事已經怨聲載道，唔知今次點收科呢？