中環出更：黃偉綸調職海事處 是禍是福？
新聞處處長黃偉綸將於下周四會正式調職做海事處處長，接替即將退休嘅廖漢波。一班特首辦同事前晚就喺快活谷馬場搞自助餐同佢farewell，由特首梁振英自掏腰包請客，同場有政府新聞統籌專員馮煒光、特首辦主任邱騰華，黃偉綸嘅繼任人、現任政務司司長辦公室專員嘅聶德權均出席，特首夫人梁唐青儀喺第個活動完結後趕到，誠意十足。
卓妮問黃偉綸下星期四就調職，會否覺得太急呢？佢就話唔覺，因為一般政務官嘅正常內部調職都係大約一個星期通知，屬於常規動作，冇咩話急唔急嘅。一向低調嘅黃偉綸又話，新職務都係一份工作，喺分工方面佢會盡力而為咁話。不過，近年海事處風波不絕，處長一職真係三煞位，黃偉綸開心食完呢餐後，過到去海事處真係唔知是福是禍喇。
至於接替黃偉綸嘅聶德權就會喺下周一上任新聞處處長一職，當晚見佢同黃偉綸不時交頭接耳，唔知係咪傾緊交接嘅事呢？聶德權話唔係，只係一般傾吓偈啫，事關交接事宜一早已經傾好晒喇。
卓妮