中環出更：傑出女性闖天地 多謝家傭
三年一度嘅傑出專業女性及女企業家選舉尋日開始接受提名，主辦單位香港女工商及專業人員聯會（女工商專聯）邀請咗過往曾得獎嘅成功女士分享處事心得及人生經驗，當中包括有首屆得獎者極地探險家李樂詩、小提琴演奏家姚珏及詠藜園董事長王小玲等。
該選舉嘅籌委會主席麥瑞琼讚揚香港女性好能幹，工作之餘又要兼顧家庭，所以好多香港女士能夠大展拳腳，唔多唔少係因為屋企有家傭。佢仲講笑話，除咗老公之外，外傭、秘書同司機係佢最重要嘅人，佢仲自嘲做嘢經常「甩頭甩髻」，出門唔記得帶手袋或外套，好在菲傭好似執藥咁一一帶番畀佢，亦都因為有菲傭，呢二十幾年來先可以放心發展事業。
姚珏：做藝術亦可搵大錢
姚珏就坦言，覺得自己最初得獎嗰陣並唔算非常專業，但被提名時整理個人資料期間，了解自己更多，得獎更令佢多咗一種動力要做得更好。佢目前籌備緊一個本地青年演奏團隊，源於好多香港家長以為音樂或藝術賺唔到錢，但佢就主張一個人應該要做自己最喜歡做嘅事，如果真係有天分嘅話，走藝術嘅路最終會比別人搵到更多錢。
同樣在事業上有所成就嘅王小玲，對工作投放好多心機，佢話為咗工作，每日只係睡四小時。不過，卓妮見佢精神奕奕，原來佢嘅秘訣就係每日飲一杯薑茶，飲完就會舒服好多。其實更重要嘅係佢對工作嘅熱誠，由當初嘅外行人，到現在臉上隱約藏有在廚房工作得來嘅疤痕，王小玲話動力係來自當年顧客嘅支持，一直堅持到今日。
卓妮