壞完又再壞，跪完又再跪，港鐵跪低事件幾乎無日無之，究竟香港人搭車仲有冇保障呀？點樣先至能夠出入平安呀？唔通次次去到港鐵站都要上幾炷香，求神拜佛唔好遲到咩？
繼上周日東鐵線架空電纜絕緣體損毀影響列車服務之後，前日下午粉嶺站又發生同類事故，列車服務受阻三粒鐘。你知啦，港鐵一跪低，乘客就頭痕，大批市民慌失失唔知點算好，搞到七國咁亂，怨聲載道。
港鐵話喎，兩次出事嘅絕緣體都係同一批次嘅歐洲名牌，一一年開始更換，近日先至發現絕緣體物料有瑕疵，懷疑增加短路機會。家陣嘅東鐵系統，仍然有六十五個同一批次嘅絕緣體使用中，佢哋話希望最快十日內趕工全部更換，將會委託海外獨立專家檢討採購及維修程序。
港鐵故障沒完沒了停不了，單計近期已經係十日之內兩次出事，仲未計之前萬九幾次，當然激嬲全人類啦。尋日喎，分別有好多團體怒氣沖沖走去港鐵總部大樓示威，有人要求加強維修，並且檢討外判制度，亦有人建議減車費補償乘客損失，更加有人呼籲嚴厲懲罰港鐵，當然有人促請行政總裁韋達誠公開道歉，仲要向立法會交代個明明白白。
計功夫茶話齋，嚴厲懲罰當然係有必要啦，不過以現行機制而論，港鐵極其量係罰款了事，而且區區幾百萬元對於一間盈利數以十億計嘅上市公司，簡直係濕濕碎啦，痛楚程度唔會大得過蚊叮蟲咬。所以咯喎，最好嘅懲罰方法唔係針對公司，而係針對個人，假如港鐵管理層一律受罰，扣減花紅甚至直接減薪，作用應該會非常明顯。你知啦，人類係一種自私自利嘅兩足動物，一旦港鐵管理層明白列車故障會損害自己嘅個人利益，佢哋就會千方百計唔畀列車故障，港鐵服務先至有可能改善，唔再出現甩甩漏漏嘅混亂場面。
有人話港鐵系統老化，年紀大自然機器壞。其實講真吖，系統老化可以更換，反而人腦退化先至最可怕，港鐵高層有幾多係尸位素餐嘅呢？有幾多係乜都唔知、人工照支嘅呢？尤其是東鐵前身根本就係退休高官俱樂部，佢哋嘅辦事能力確係值得懷疑。即係咁，假如扣減花紅甚至直接減薪都無補於事，咁就要搵人開刀嘞，將一眾廢柴掃地出門，一律不得留低！
好心特區政府作為港鐵大股東唔好再愛理不理啦，必須下定決心手起刀落，好好整頓呢一間不斷故障嘅跪低公司。正所謂咯喎，打鐵還需自身硬，政府若然唔夠硬，點樣去打港鐵呀！