學民思潮發起五區辭職公投運動，呼籲泛民喺五區各搵一個議員辭職，再以爭取公民提名作為單一議題參加補選，以測試市民對公民提名支持度。雖然學民已約見多個泛民政黨爭取支持，但一直未約支持五區辭職嘅立會議員黃毓民。原來學民諗住有禮貌啲寫信畀毓民邀請佢傾，但一直未動筆，即係毓民未答應辭職。
毓民話，想當年社民連同公民黨之所以發起「五區總辭，變相公投」運動，全靠佢推波助瀾，不過時至今日，當學民再度發起五區辭職運動而佢又話自己一定會參與時，學民就好似當佢冇到咁無搵過佢，覺得大家有需要時就當佢係民主派，無需要時就唔多理佢喎。
學民思潮發言人黎汶洛解釋，學民將會喺呢一至兩日去信毓民爭取支持，佢話毓民多次表明樂意辭職，學民成日都想搵佢詳細坐低傾，不過又覺得用短訊邀請對方見面唔多禮貌，所以先至一直無行動。真普聯尋晚開會都有討論過五區辭職問題，不過據聞各黨都抱觀望態度，視乎情況發展再決定參唔參與。