早幾日有網民以「驅蝗」為號召，踩落廣東道向內地旅客抗議發洩不滿，嚇得立法會金融服務界議員張華峰好驚，批評行動影響投資者投資意欲，仲即刻向立法會提出緊急質詢添，點知被主席曾鈺成拒絕。地產及建造界議員石禮謙（大舊石）亦插嘴，話東莞有好多來自香港嘅投資，「驅蝗」行動對當地經濟影響好大喎。但「驅蝗」又關東莞咩事呢？
原來大舊石講緊東莞早前嘅「驅黃」掃黃行動，唔怪得商界林健鋒都揶揄佢「點解廣東道講到東莞」嘞。反「驅蝗」變反「驅黃」，唔通大舊石因某啲原因，要反對內地政府掃黃？講開「驅蝗」，再有網民喺網上發起「讓愛與拖拉急（喼）佔領旺角」第二波行動，號召網民一齊拉個空嘅拖喼，遊西洋菜街癱瘓交通。咁樣搞法，呢個行動分分鐘咪好似去年八月，聲討教師林慧思粗口辱警嘅旺角集會咁七國咁亂？
另外，有大陸門戶網站尋日撰文，探討激發中港矛盾嘅原因之一，可能係內地人根深柢固嘅「恩主心態」，指內地媒體長期向民眾灌輸「錯誤觀念」，將互惠互利嘅平等交易，理解為居高臨下嘅支配，「把生意當作恩情」喎。不過，文章發表唔夠三個鐘已極速被刪除喇。其實以前港人到內地消費咪又係抱住一種「恩主心態」，只係依家風水輪流轉啫。