自由黨一向自稱「中堅中立」，從來不為反對而反對，會憑良心發聲，其黨魁田北俊（田少）更曾揚言，日後有政府議案提上立法會時會以民意為依歸。點知言猶在耳，立法會尋日開始恢復二讀買家印花稅「辣招」草案時，田少等自由黨中人竟然支持會計界議員梁繼昌提出嘅中止待續議案，加上泛民主派全力支持，令支持和反對票喺功能界別一度緊張，幸好有關議案最後有驚無險地被否決。有接近政府消息人士慨嘆，究竟田少等人有幾憑良心發聲，相信不言而喻喇！
田少尋日發言時，主要針對運輸及房屋局局長張炳良就「加辣減辣」嘅口頭承諾，自言如果承諾係有用，港視主席王維基也可根據佢當年得到某女高官嘅承諾，去反告番政府，以此寓意口頭承諾係冇法律效力。
不過，有接近政府消息人士一針見血反駁，呢兩件事性質不同，不可以作簡單類比，又指「雙辣招」喺民調一直得到近七成市民支持，田少非但反對「辣招」主體法案，加上支持中止待續議案，呢個同佢口講會以民意為依歸「背道而馳」，更令人有合理懷疑究竟該黨係為市民發聲吖，定係暗地裏為地產商利益發聲呢？