政情：陳家洛霸咪有奶便是娘
立法會議員鍾樹根尋日喺立法會提出口頭質詢，針對筲箕灣愛德街同愛勤道交界用地建插針式私樓，或會影響鄰近地區嘅通風同採光。就呢個議題，樹根嘅民建聯（民記）黨友、東區區議員顏尊廉就同一眾東區街坊，於立法會未夠鐘開會前，去到政府總部外示威同遞信畀樹根。點知喺示威入面，竟然見到公民黨議員陳家洛，佢仲攞住民記嘅大聲公，企喺印有顏尊廉樣貌示威海報前叫咪，莫非陳家洛加入咗建制派？
拎住民記大聲公叫咪
話說尋日朝早未到十一點鐘，顏尊廉同廿幾名東區街坊，拎住印有黨徽嘅示威牌到政府總部外請願，話反對政府喺筲箕灣起屏風樓，要求當局擱置計劃。樹根到場接信，但點知喺樹根離場時，緊隨其後竟然見到陳家洛到場。陳家洛仲攞住民記嘅大聲公，企正喺前面叫咪，唔知仲以為佢轉咗黨。不過佢呢個舉動，據聞就引起部分民記支持者不滿，有人鬧佢「抽水」，有啲人話佢「博出位」，有啲更批評佢係「有奶便是娘」添！
聲稱係顏尊廉交畀佢
陳家洛回應話，唔覺得自己嘅出現有咩問題，因為佢都有跟進呢件事，況且唔少到場示威嘅居民都係佢擁躉，佢依家同民記嘅意見又一致，所以佢只係支援吓班街坊啫。佢仲話，自己過去六年都喺唔同地方反對劣質規劃，所以民記今次反對政府賣地，其實係支持緊佢嘅立場喎。不過，最奇係陳家洛點解可以攞到民記個咪喺度講嘢呢？佢就話係顏尊廉交個咪畀佢嘅，如果真係咁送上門任由對手騎劫請願，民記區議員嘅和諧同包容性就認真大喇。
講番個會議，樹根發言時話，擔心屏風樓會影響當區空氣流通，質疑政府喺招標賣地前，冇研究新樓宇對居民嘅影響。陳家洛就批評政府一意孤行，促請當局停止招標。發展局局長陳茂波就話，根據城規會評估，呢幅用地係符合建築物條例下，有關採光同通風嘅規定。