政情：中環出更：電郵被駭 澍堃獲窩心關注
電郵黑客最近頻頻蒲頭，有唔少名人嘅電郵相繼被入侵，黑客透過名人電郵帳戶廣發電郵，聲稱名人在外地被盜竊或遇劫而急需支援，從而騙取金錢。繼早前「旅遊達人」項明生中招後，尋日又輪到香港賽馬會大董葉澍堃（Stephen）中招。好彩Stephen最後冇損失，仲難得發現原來自己有咁多好朋友關心，無啦啦過咗窩心嘅一日。
話說Stephen尋日下午三點幾鐘，突然好多朋友通知佢，話收到佢一封電郵，內容講述佢身在塞浦路斯開會，點知喺一個巴士站被賊人偷咗個袋，身上所有證件、錢同電話等重要物品都全部冇晒，然後話好需要朋友幫助喎。其實呢啲老土呃人橋段，一睇就知假到爆啦，好耐之前就已經見過。因為呢件事，Stephen尋日前前後後合共收咗成百幾個朋友嘅電話、短訊同電郵問候，真係回覆到手都軟埋。
事實上Stephen嘅屋企人就當然知道佢依家身在香港啦，所以唔使打電話去核實都知呢單嘢係流料，邊有咁容易上當吖。
卓妮