政情：中環出更：金價低迷張德熙仍睇好
去年初國際金價一夜之間勁跌近一成，曾經掀起一陣搶金潮，點知金價愈跌愈有，去年累計勁跌約三成，係三十年來最大跌幅；雖然農曆新年後國際金價小回春，但仍處於低位。做珠寶金飾生意嘅中西區區議會前主席胡楚南直言睇唔透後市，太子珠寶鐘錶主席鄧鉅明就打算到內地開金舖，算係審慎樂觀嘅穩陣派。金銀業貿易場理事長張德熙（Haywood）就繼續做激進嘅黃金大好友，力撐黃金仍係最佳避險工具。
胡楚南話，去年嘅金價走勢好難捉摸，幸好透過對沖及減少存貨等風險管理，公司最終都錄得理想業績。負責幫佢打理生意嘅新抱王凱曼就話，去年金價波動之大係佢入行多年前所未見，以往只需參考美元匯價即可判斷金價走勢，但係近年量化寬鬆政策及地緣政治亦係左右金價因素，以致過去分析金價嘅方法未必管用，增加經營難度。好彩佢哋兼營鑽石，可以分散經營風險。
去年「中國大媽」搶金實力震驚華爾街，鄧鉅明亦睇好內地金飾市場，準備將旗下鎮金店帶入內地二、三線城市。負責開拓內地市場嘅鄧太宣宏雁話，相比起開珠寶鐘錶行，金舖開店成本低好多，而且金飾勝在單價低，幾百元就有交易，正好符合內地吹起嘅節約風。
料後市重拾升勢
一向睇好黃金前景嘅Haywood就話，呢一波跌市係受到美國逐步減買國債影響，一旦美國全面退市，消除此一不明朗因素後，相信金價可重拾升勢。佢透露，好多大型基金及投資機構嘅投資組合中，黃金仍然佔兩至三成，因此黃金仍可睇高一線，預計今年第二季可升至每安士一千二百美元至一千四百美元之間。不過，以上純屬名人嘅個人意見，係咪投資黃金都要大家自行評估風險。
卓妮