隧道收費不變 交通擠塞依然

呢一次個人嘅痛苦經驗，實際上係香港嘅集體回憶，事關紅隧塞車根本就係無日無之嘅常態。所以咯喎，不斷有人呼籲特區政府必須想辦法改善紅隧嘅交通狀況，其中一個建議係咁嘅，紅隧加價趕客，東隧減價吸客，換取兩條過海隧道嘅汽車流量稍稍平衡，呢一個建議簡稱就係「東減紅加」。

哈，點不知官老爺話喎，暫緩試行東減紅加，做法非常之咁務實又負責任。運輸及房屋局局長張炳良話喎，三個月諮詢共收到超過一百份意見書，普遍支持改變隧道收費，促成車流轉向，但對當中三個方案未有主流睇法。張局長又話，東隧去年每日平均行車量增至七萬二千架次，假如東隧減價，東隧估計行車量將進一步增至七萬七千架次，接近設計容量七萬八千架次。至於紅隧咯喎，去年平均每日行車量減少三千架次，係二十五年以來最低，喺此消彼長嘅情況之下，政府考慮等到二○一七年中環灣仔繞道開通，並且東隧專營權回歸政府之後，先至通盤考慮交通分流嘅措施。

根據張炳良嘅講法，政府將會繼續密切監察三條過海隧道同附近交通嘅狀況，視乎需要採取交通管理措施，亦會考慮完善集體運輸系統同其他配套，研究喺中環試行電子道路收費計劃。

講完一大堆，其實重點係四個字：乜都唔做。

功夫茶真係唔明，既然意見書普遍支持改變隧道收費促成車流轉向，點解唔從善如流呢？三個方案冇主流睇法啫，局方都可以主動研究出一個做法吖嘛，點都好過坐以待斃，任由紅隧繼續日日塞車。

再講吖，所謂研究喺中環試行電子道路收費計劃，即係收買路錢啦，究竟會唔會有效減少行車量呀？人哋要去中環始終都要去中環，唔通貪得意遊車河咩。

講真吖，東隧如果因為減價而增加車流至設計容量，咪由得佢囉，事關紅隧早就超出設計容量，每日平均車輛有十二萬架次，飽和程度係百分之一百以上。既然紅隧頂得住，點解東隧又頂唔住呢？家陣係講緊接近設計容量之嘛，又唔係超出。

有時真係難怪納稅人咁多怨言，年年交稅將咁多問責高官養到肥肥白白，點知到頭來乜都唔做，隧道收費不變，交通擠塞依然。大家唔好唔記得，東減紅加顧問研究同諮詢都要使錢，公帑就咁白白浪費咗。