「上東網，知天下」；東方報業集團銳意發展新媒體，旗艦網站「on.cc東網」不斷增強功能和豐富內容，打造全球華人最強資訊網。老朽稍有空閒，必上東網盡情瀏覽，皆因其「怡人耳目，悅人心情」，這天，重溫東網獨家「周潤發專訪足本」，睇發哥談瘦身，說生活，論做人，娓娓道來，自然舒暢。
看發哥輕鬆自在接受東網記者提問，他和顏閒話，完全沒有一點大明星的架子；他一個人行山、坐地鐵四圍逛，自得其樂，確是真情流露；吾女有個朋友，某日去行山偶遇發哥，竟得與發哥同行，其女讀小學一年級，已是行山常客，欣然與發哥合照並攜手同行，高興到不得了，並晒命：發哥車佢哋到九龍塘地鐵站，並邀其女下次再去行山！吾女不知幾咁欣羨：點解我行咁多山，從未碰過發哥！對曰：無緣！加上你成日唔向前望！吾女為之氣結！
閒語表過，可知發哥的親民，不是如內地高官做騷，去乘公共汽車唔知點買車票，一嘢就穿幫喇！
睇完發哥簡樸嘅日常生活，老朽都要多做吓運動，從發哥身上，更知運動、步行使人年輕！發哥是個生活家，佢食人間煙火，坐地鐵體驗民情，而其所說的每句話，尤其做人道理，談到自己從無綫出身，對母台的那份情，身為國際級巨星嘅發哥，依然把自己看成「魚」而不是「水」，魚不可離水，而水可無魚，當今不少未紅先驕嘅哥仔姐仔，睇吓呢輯東網獨家訪問發哥，細細咀嚼回味，必有所得。
行文至此，想起斯諾的《西行漫記》形容毛澤東身上有一種天命的力量；這並不是甚麼曇花一現的東西，而是一種實實在在的根本活力。睇完東網獨家專訪發哥，乃知發哥有一種大明星小市民的根本活力，這活力，永遠吸引，且隨時間恒久而愈芬芳；發哥，你係得嘅！