政情：公民講場：針對內地旅客 梁金成認衰

發起「廣東道驅蝗行動」、網名「金金大師」嘅梁金成，經過社交網站連日宣傳，仲呼籲出席網民要自備「殺蟲水」玩綽頭後，周日不但成功號召幾十名網民到尖沙咀廣東道向內地旅客示威「驅蝗」，仲嚇到金舖「拉閘」生意都唔敢做，「大師」隨即面對中港兩地輿論連番狙擊，港府更揚言會調查事件係咪有人涉嫌違法。唔知係咪知衰玩出禍，梁金成尋日出席電台節目時就即時認低威，承認行動激烈咗少少，仲向受影響旅客同商舖講聲唔好意思，早幾日揚言「下一站旺角」嘅鴻圖大計就以「未有定案」打圓場。錯就要認，打就企定，今次梁金成搞到一鑊泡，「大師」都難逃劫數呀！