新界鄉議局將於下周五去深圳舉行半日集思會，估計都係傾組黨參選嘅事啦！不過，主席劉皇發（發叔）尋日忽然話自己從來冇話過組黨，佢由頭到尾都只係話要詳細研究選舉部署。嘩！咁都講得出口嘅？咪忘記近期副主席林偉強等人一直都講組黨講得興高采烈，如果冇發叔首肯，邊個敢亂講嘢呀？一係下面班鄉紳已經唔聽發叔支笛，一係就有人已經搵過發叔傾偈訓示，搞到佢未出戰先收兵，認真兒戲。
話說林偉強自上月喺電台爆出鄉議局組黨之後，就不時喺各大媒體發放組黨嘅計劃同理念。咁啱鄉議局尋日講到佢哋去深圳搞集思會，我哋梗係問吓發叔有關組黨嘅進度啦！點知發叔話，佢冇講過組黨，淨係話要整合鄉議局，因為好多嘢都要研究，例如鄉議局派人參選嘅勝算有幾多，又或者係咪繼續幫其他建制派抬轎等，總之咩都要傾喎。發叔咁講，係咪啫係代表鄉議局組黨壽終正寢呢？
記得上星期立法辯論施政報告時，發叔仲狂插個人遊政策，又話旅客擠擁，港人命苦等等，點知佢尋日竟然大鬧啲「驅蝗」人士令香港蒙羞，又認為佢哋已涉及歧視內地遊客，叫「廢官」平機會主席周一嶽唔好「視而不見」，要「嚴正處理」喎。莫非發叔事後被人訓示過？