政情：論壇奮戰 袁國強安然出「城」
政改諮詢至今差不多有兩個半月，大學生就率先喺今個月起搞學界公投，尋日仲搵咗律政司司長袁國強出席城市大學舉行嘅政改論壇，班學生當然唔放過呢個挑戰權威嘅好機會啦，由道具到發言都寸到司長應一應。不過，袁國強今次深入「虎穴」奮戰兩小時，雖然面對學生種種挑戰，但整體表現都算大方得體，安然無恙行返出城大會場。
一班叫「新青年」嘅大專學生團體，尋日整咗五、六個有袁樣貌嘅人形紙板做道具，連同學民思潮約十人包圍袁國強，搞到袁要由保安護送入場。論壇上有學民思潮成員問佢公民提名係咪違反《基本法》，仲要求叫佢發一個單音「yes」 或「no」（係定唔係），唔好「遊花園」。袁做得資深大律師，咁易被畀班學生盤到咩，所以佢冇直接回答，話唔會具體評論。
遇學生示威
又有學生問袁認唔認同學界嘅公投結果，佢就重申政府會視所謂「公投」為民意調查嘅一種，會予以考慮。不過，中大學生會外務副會長岑敖暉就話中大有條例講到明學生會有權搞全民投票，袁司長係公然踐踏公投嘅法律地位喎。最後袁為避開學生示威，由後門離開。