泛民主派和建制派對公民提名普選特首爭論不休，多名建制派近日先後開腔對政改達成共識不感樂觀，係咪再向泛民伸出友誼之手也意見不一。有親中重量級人士分析，中央早前至少兩次釋出善意，首先係中聯辦回請立法會議員飯局，但礙於部分泛民拒絕進入中聯辦已無疾而終，其後係上周四中聯辦新春酒會，又首次邀請泛民議員出席，但最終只有不足十人出席。
該名親中人士直言，部分泛民視同中聯辦交往溝通係「洪水猛獸」，反問如何同中央進一步溝通？又話適逢今年係國家成立六十五周年，倘邀請全體泛民到北京參加儀式，到時又被泛民拒絕就真係唔知點好喇。不過，亦有建制派人士話，為落實政改冇可能唔同泛民溝通，否則政制只係會原地踏步。
泛民方面，除了繼續堅持公民提名，另一關注係二○一七年普選特首時，泛民背景參選人能否成功「入閘」並「出閘」。有親中人士指，有泛民中人私下表示可接受候選人數目訂於五人，「預料到時實掂」，然而泛民依家仲係「耍無影腳」，未有觸及政改核心問題，因此呼籲泛民認清中央係「受軟不受硬」，同時不要過於計算選票得失，為達成普選共同努力。