政情：前助理與田二少格劍

過檔工黨未息怒

該篇報道話田二少呻繼佢嘅前助理阿來過檔工黨之後，近日再有職員轉投工黨懷抱。田二少仲喺報道中透露，阿來離職時將佢喺地區工作三年以來嘅資料帶走，令到佢好無奈，好彩今次呢位職員離職就冇發生呢類不愉快事件。其實呢位職員都係阿來介紹入新民黨，依家阿來離職，佢亦以「理念唔同」為由跳槽。

過檔後被踢爆原來係支聯會青年組義工嘅阿來，依家已經係工黨社區幹事。佢尋日出咗份聲明，話有關報道指佢離職新民黨時帶走三年地區工作嘅資料係與事實不符，佢本人離職後絕對冇竊取公司任何財產。佢仲話，雖然大家嘅政治立場係大相逕庭，但「君子之爭，講事實擺道理」，唔需要為求目的抹黑對方咁話，對田二少嘅不實、誹謗言論極度遺憾喎，若田不收回言論兼道歉，就會考慮採取進一步法律行動。

田稱交律師處理

田二少接受我哋查詢時話，阿來帶走資料一事係有根據嘅，皆因幾個街坊都向佢投訴，話阿來離職後仲聯絡佢哋，質疑阿來點解會有佢哋嘅個人資料。田二少都係聽到街坊投訴先知資料畀人攞走咗，佢仲同我哋講︰「我都冇追究啦，如果佢（阿來）有進一步行動我咪交畀律師處理囉！」

其實田二少同阿來嘅恩恩怨怨並非一朝一夕嘅事，早已有傳阿來一直心儀荃灣愉景新城選區，奈何田二少就決定自己上位，最終喺二○一一年區議會選舉擊敗民主黨王銳德，當選該區區議員。阿來喺去年投向工黨後未有放棄愉城區，仲密密落區派傳單，又擺檔受理街坊投訴，擺明向前僱主田二少挑機。睇來佢哋嘅過節仲複雜過啲勞資糾紛，真係唔知幾時先了結喇。