現屆政府講過一次又一次，房屋政策係重中之重。講還講，做還做，有冇實際辦法改善居住困難嘅情況先？你知啦，家陣香港人好鬼死可憐，買樓固然望穿秋水都買唔到，租房又可能因為捱唔起貴租而屈就於劏房，一個唔覺意隨時因為通道受阻而葬身火海。
長遠房屋策略督導委員會向政府提交諮詢報告書，運輸及房屋局局長張炳良話喎，社會普遍認同長策會提出嘅政策總方針，以供應為主導，包括新增單位供應以公營房屋佔多數，未來十年興建四十七萬個住宅單位嘅目標，維持公私營房屋六四之比係合理平衡。
張局長仲話，長策會對於社會有意見要求恢復租務管制有好多憂慮，認為租務管制會即時推高租金，建議政府先取得社會共識。至於租金援助，長策會又憂慮會引發業主加租，變相為業主輸送利益。至於劏房問題又點呢？張炳良話長策會促請政府繼續加強取締工廈劏房，其他劏房應該針對違反樓宇同消防安全規定而加強執法。
大家可能會問，未來十年興建四十七萬個住宅單位究竟有冇可能實現呀？根據相關人士嘅想法，可以提高發展密度增加建屋量，重建高齡公共屋邨，喺維港以外填海，開拓新發展區，甚至乎「開發郊野公園用地建屋」。
呢嗱嗱嗱，一提到開發郊野公園，大家不期然諗到三個字：盲搶地。喂，郊野公園作為香港人遊山玩水嘅後花園，係唔係應該攞去起樓呀？有冇咁嘅必要呀？正如天文台前台長林超英話齋，郊野公園畀市民可以低成本享受自然美景，好多人對郊野公園有濃厚感情，唔理解為何每次討論土地問題嘅時候，都有人提出動用郊野公園，其實香港仲有好多平原地方未盡量發展。
講真吖，官老爺實在唔應該打郊野公園主意，一來犯眾憎，二來容易節外生枝，話唔定惹來群情洶湧嘅示威抗議，咁就會影響建屋大計。就好似發展新界東北咁吖，一旦有人質疑成個計劃係為咗內地富豪服務，再好嘅構思都會諸多掣肘。
好彩，長策會似乎都知驚，報告書特別提到，公眾人士普遍對於開發郊野公園用地建屋表達「頗為強烈的反對意見」。有人認為大嶼山郊野公園可以考慮發展商業、旅遊同住宅項目，藉此增加就業機會。計功夫茶話齋，大嶼山咁大，仲大過香港島，係唔係只有郊野公園先至適合發展呢？咪玩啦，銅鑼灣起樓都唔會侵佔維多利亞公園啦，吓話！
總而言之，覓地起樓大方向正確，麻煩政府唔好橫衝直撞搞到節外生枝就得嘞。