政情：今日你上鏡：監獄少咗人住 單日堅搞裝修

尋日仁濟醫院舉行新春團拜，政商界名人都去趁熱鬧。仁濟一向對釋囚慷慨施援，懲教署署長單日堅梗要去捧場。我哋見佢神情咁輕鬆，笑容滿面，斷估佢啲「住客」實好聽話，唔鬧事喇！單日堅聽完笑笑口話，近年在囚人士的確一路減少，現時監獄「入住率」低過八成，所以佢哋正好趁機騰空部分監獄進行保養裝修工程。講真嗰句，在囚人士踎監已經係為佢哋嘅罪行付出代價，政府若有資源都應該畀佢哋住好啲嘅。