政情：促推港元債市 公專聯唔怕瘀
公共專業聯盟（公專聯）尋日發表金融專家組第二號報告書，批評財金官員漠視債券市場發展。雖然港府已經表態唔打算喺現階段發展本港債券市場，但公專聯兩位立法會議員梁繼昌（Kenneth）同莫乃光（Charles）仍然唔怕食檸檬，要求當局採取措施加強推動港元債券市場發展，例如推出更多港元債券等，認真唔怕瘀。
Kenneth話，未來幾年本港有唔少基建發展需要動用大筆資金，例如機場第三條跑道、迪士尼樂園酒店及喺大嶼山興建人工島等。如果政府鼓勵更多公營機構發債，佢哋就可以利用債券進行融資，咁就唔使吓吓攤大手板問政府攞錢。
梁繼昌批官員冇勇氣
不過政府對此回應冷淡，仲話本港財政充裕暫無發債需要，Kenneth就批評，官員對金融市場長遠整體規劃欠缺視野及勇氣，唔係殺到埋身都唔肯做。又話財爺多番警告儲備會有用完嘅一日，依家更加要開始發展債市，唔係到時就手忙腳亂喇！