政情：相識17載 洪家耀網悼Ringo
上星期六海洋公園保育基金「鯨豚擱淺行動組」接報，發現一條雌性中華白海豚屍體擱淺屯門黃金海岸海豚廣場海邊，原來呢條白海豚叫Ringo，同海豚專家洪家耀（Samuel）相識咗十七年。
Samuel尋日講起件事亦難掩傷感，佢話九七年回流返香港做海豚研究，第一條識嘅白海豚就係Ringo，十幾年來一直追蹤佢嘅足迹，對Ringo離世覺得好不捨。
Samuel話，好清楚記得Ringo嘅編號係「NL11」，皆因佢嘅斑點少、白白淨，頸上面有一條明顯傷痕，可能係佢細個曾經畀漁網纏住，爭脫之後造成嘅疤痕。前幾日佢亦係憑住呢條疤痕認出條豚屍係Ringo。
港最年長嗰批白海豚
Samuel話，如果換算做人類嘅年齡，Ringo應該有四十歲，年齡仲大過自己，算係香港水域最年長嗰批白海豚，覺得佢應該係年紀大、自然死亡。海洋公園保育基金尋晚公布死因報告，話Ringo胃部有未完全消化的魚骨，相信死前曾經進食，但因為Ringo屍身被發現時已經中度腐爛，所以確認唔到死因。Samuel尋日將社交網站嘅個人頭像轉咗做Ringo生前喺海上暢游嘅相，以悼念呢位特別嘅老友。