政情：死（舌累）新大樓港台添煩亂
香港電台將軍澳新大樓方案，早排因為開支由十六億元「三級跳」去到逾六十億元，建制派議員紛紛耍手擰頭而胎死腹中。點知港台一方死心不息，計過條數後話只差三、四票即可獲立法會通過。不過商務及經濟發展局局長蘇錦樑闊佬懶理，尋日重申唔會再諗將方案送返去立法會工務小組審議。但係港台員工又點會就咁算數吖，港台工會今日將趁行政會議開會前示威，將五百個網民及議員聯署交畀特首，實行死要新大樓！
唔再重提上工務小組
自從立法會工務小組委員會否決新大樓撥款申請之後，局方提出「減磅」七億元方案，不過都係爭取唔到議員支持，結果蘇錦樑主動撤回方案，引起港台員工不滿。工會二月初先召開員工大會要求廣播處長鄧忍光發信畀局方，重新考慮將方案交畀工務小組或財務委員會審議。
蘇錦樑尋日再次重申，多次向議員解釋原方案同「減磅」方案之後，結果議員態度都差唔多，所以唔會再重提上工務小組喇！佢又話，現階段最重要係同港台諗掂應付短期需要嘅方案，同埋準備重新招標程序。
工會主席蔡玉玲反駁話，局方游說工作馬虎。工會上星期自行游說泛民及部分建制派議員，獲泛民廿七名議員聯署支持新大樓方案交畀財委會表決，田北辰同梁家騮兩名建制派亦支持，加上行會三名立法會代表李慧琼、林健鋒同葉劉淑儀，夾埋起碼有三十二票，票數相當接近過半數。
局方被斥冇誠意護航
蔡玉玲又爆料細數局方不是，有建制派議員話，覺得政府對方案獲得通過態度「可有可無」，亦有政界中人話，局方係因為驚夠票通過，先喺一月急撤方案，仲話局方撤回方案前一日先搵泛民議員溝通，一句講晒，局方根本冇誠意護航。工會又批評港台唔肯應員工要求，向公眾詳細解釋造價飆升原因，質疑局方係咪想藉此壓制港台落實公共廣播。佢哋仲捉字蝨話局方只係唔會再上工務小組，不如直接上財委會，留下歷史紀錄咁話。
港台就回應話，佢哋游說咗議員廿次，肯見佢哋嘅議員都見晒，但係真係唔夠票。其實睇番今年一月工務小組表決，泛民議員范國威都有份反對，證明唔係所有泛民都支持啦！