中環出更：妻前賣口乖 WK智救愛驅
立法會工程界議員盧偉國（WK）近日經常揸架古銅色嘅古董車返立法會，同其他議員嘅時髦新車泊埋一齊特別搶眼。WK架車係「波子」911 Targa型號，係佢喺九十年代同一位工業家朋友買入。WK話，咁多年來架車都係擺喺屋企曬太陽，老婆一度嫌架車阻碇要求賣咗佢，好彩佢諗到一條好橋先至成功說服老婆咋！
讚太太「愈老愈可愛」
咁究竟係咩招數呢？WK笑笑口話，佢同老婆講：「你愈老愈可愛，我都唔捨得賣走你，更何況架車？」就係咁簡單，唔止成功氹到老婆，又唔使割愛賣車喇！估唔到WK都幾有急才。
WK話，「波子」係唔少男人心目中嘅dream car，當佢發現朋友打算出讓呢架八八年出廠嘅保時捷時，佢二話不說就買咗佢，仲為佢配上「JK911」嘅車牌。佢大讚架車設計精巧，車身線條近乎完美，性能亦一流，上斜路時引擎都好夠力，落地廿五年來甚少維修，堪稱機械工程嘅傑作。最近佢揸開嗰架車突然壞咗，於是就趁機開架古董車出嚟風騷吓。
卓妮