中環出更：雪災玩殘名人落難日本
日本持續受到大風雪吹襲，唔少開開心心去東京玩嘅港人都被玩殘，智經研究中心主席李國棟（Donald）被迫瞓機場一晚，係佢咁大個人第一次。立法會前議員梁劉柔芬（Sophie）同老公梁孔德拍拖去玩，結果焗住用二十萬日圓（約合一萬五千港元）住一晚酒店，認真慘情。
李國棟滯留 被迫瞓機場
早前卓妮喺一個新春酒會見到Donald，講起喺日本嘅遭遇時話，當日佢原本搭夜機返港，眼見班機不停延遲起飛已覺得唔對路，諗住快手訂酒店過夜，但又擔心大風雪令東京交通大混亂，如果貿貿然離開機場出市區，遇到大塞車塞死喺高速公路仲弊，到時凍死路邊都似，所以最後等到佢班機真係取消之後，佢惟有留喺機場打地鋪，搵幾件衫當被冚。Donald話，瞓機場都係佢咁大個仔第一次，難得佢仲好睇得開，讚東京廁所乾淨企理喎！
梁孔德夫婦酒店「豪」宿
Sophie同老公梁孔德都喺東京飽受折騰，Sophie話，返港當日喺東京機場等咗四個鐘都上唔到飛機，惟有出市區住一晚酒店。豈料市區酒店坐地起價，一間房索價廿萬日圓，Sophie惟有荷包出血照住。不過，即使好肉赤，修佛學嘅Sophie就話，做人睇開啲就無嘢困擾到自己。
立法會勞工界前議員葉偉明新年期間就留港消費，笑言新春期間出街感覺冇咁多人，佢有親戚住喺上水圍村，新春期間行一趟，覺得嗰度多咗好多人喎！久未露面嘅前資訊科技界議員譚偉豪就話，唔做議員後幾乎每個月都去旅行，去得最多就係台灣，台灣科技業出晒名，唔通譚偉豪想去搵商機？
卓妮