細站頭五條線 人巴爭路
西環西寧街巴士總站「站齡」偏高，使用量更隨地區發展而日增，多年前已告「爆棚」。然而，即使出現巴士剷上行人路、五條巴士線停泊同一站頭、人車爭路等情況，運輸署仍未擬改善，堅稱需待西港島公共交通服務重組計劃實施後才檢討，遭立法會議員怒斥不負責任；區議員則要求盡快重新檢視區內巴士路線及車站配置，以根治問題。
「個巴士站太細，五條線巴士要逼喺同一個站頭上落客，下晝啲車返晒嚟就仲逼！」劉先生居於西環多年，發現西寧街巴士總站年前已出現「爆棚」情況，不少巴士更需駛上行人路，以騰出空間供返站巴士停泊，不時造成人車爭路險象，「成條行人路剩番條罅，次次都要行出馬路，你都咪話唔牙煙！」
記者曾實地了解，發現車站所有停車坑位已泊滿巴士，適值有巴士返站，便需直接駛上站內行人通道，有短短一條通道已停泊四部巴士，只餘狹窄的通道，無法讓兩人並肩而過。由於西寧街巴士總站有多線共用，乘客需走出馬路登車，秩序混亂。
六十年代啟用 早已飽和
當區區議員陳學鋒指出，西寧街巴士總站於六十年代啟用，使用量早已飽和，不滿當局一直未有檢討區內巴士路線及車站配置，「政府喺九九年開多咗個卑路乍灣巴士總站，就放晒啲快線車喺嗰邊，西寧街呢度就集中經中、上環嘅慢車，仲要有三條路線係重疊嘅，中、上環又成日塞車，結果咁多條線嘅巴士就成日堆埋一齊返總站，搞到個站更加爆棚！我哋一路有建議分番勻啲路線，但運輸署都唔理！」
運輸署發言人承認過往曾接獲投訴，但指現正就港鐵西港島公共交通服務重組計劃作諮詢，待計劃實施後才會檢討西寧街巴士總站的使用情況及作適當安排。發言人指現時共有八條巴士路線以該站為總站，當中六條提供全日服務，兩條於繁忙時段服務。至於城巴及新巴發言人則稱，將提醒車長將車輛停泊在適當位置。警方發言人表示，過去兩年曾接獲七宗有關投訴，共發出五張定額罰款通知書與多個口頭警告。
議員直斥無視市民安全
「既然一早知道個車站爆棚，點解唔早啲做檢討，件事關乎人命安全，如果真係有人畀車撞親就大件事！」立法會交通事務委員會委員王國興批評當局「拖得就拖」，無視市民生命安全，「下下都要等西港島線通車之後先算，唔通叫市民喺通車之前唔搭巴士咩？」
記者：呂耀焜、何穎賢