政情：公民講場︰硬銷辣招感觸「良」多

立法會尋日繼續辯論施政報告致謝動議，土地、房屋政策作為政府施政嘅「重中之重」，多位議員梗係落足彈藥，向運輸及房屋局局長張炳良連環發炮啦。不過，立法會下周三就恢復二讀買家印花稅（BSD）嘅「辣招」草案，心繫「辣招」嘅張炳良總結致詞時，就有感而發話面對當前嘅房屋問題，自己心入面都冷靜唔到、感觸良多，但手上冇魔術棒，所以一切要按部就班咁話。佢仲用咗相當多篇幅硬銷「辣招」只係「非常時期嘅非常措施」，安慰議員會適時「減辣」甚至「撤招」。咁多口水，目的咪為「辣招」向議員拉票囉，但感唔感動到議員就要下周三先知結果喇。