政情：中環出更︰馬逢國感冒 渣馬或休戰
一年一度嘅渣打馬拉松將會喺後日舉行，唔少運動好手報名參加各項賽事，挑戰自己。雖然立法會議員梁耀忠今年因傷缺陣，但仲有最少兩位議員報名參加馬拉松賽事。體育、演藝、文化及出版界馬逢國透露，今年佢報名參加十公里賽事，但由於呢幾日患上感冒，唔係好出到聲，後日未必可以如願去跑步喇。不過，把聲同跑步有咩關係呢？
馬逢國話，由年初二病到依家都未好番，如果情況持續，今年就可能要同馬拉松講拜拜。佢話去年同今年都係報名參加十公里賽事，又話原本想進一步挑戰自己報半馬賽事，但後來諗諗吓都係決定維持「原判」。
莫乃光練習拉親條筋
另一位報名參加比賽嘅就係成日行山嘅資訊科技界議員莫乃光，佢話去年用咗兩小時三十九分鐘完成半馬賽事，預計今年成績會差過去年，目標係喺三個小時內跑畢全程。佢話自己年初一同年初三都有練習跑步，但就唔小心拉親條筋，希望可以好快好番去參加比賽喎。
卓妮