政情：中環出更︰財案「走甜」啱商會口味
馬年經濟前景唔明朗，財爺都打算「閂水喉」，預告會喺財政預算案「走甜」，唔再人人派糖，令中產怨聲載道，但反而商界名人齊聲讚好。中華總商會副會長方文雄（David）日前出席新春酒會時話，財政量入為出係一件好事，事關香港經濟發展要睇長遠，唔應該只着眼今天，下一代需要有良好財政儲備，一旦本港經濟受衝擊，都有防守力同保障。
對於「走甜」會否激起民憤，David話，市民唔開心一定有，但相信香港人會理解：「如果香港人人有工開，又不至於會人人走上街示威嘅。」中總榮譽會長蔡冠深就認為，財爺審慎理財係有必要：「有需要嘅時候，當然要派（錢）啦，但唔代表有錢就要派晒。」佢建議政府多着眼援助中小型企業發展，投放更多財力：「中小企經營唔容易，應該大力支持至得。」
倡增免稅額助中產
作為廠家嘅觀塘區議會主席陳振彬都話，目前係合適時間減少派糖，擔心長此下去會增加政府財政負擔，建議財爺可透過增加免稅額來扶助中產人士。佢又反對開徵陸路入境稅，擔心會影響旅遊業發展。中華廠商聯合會會長施榮懷都認同依家係合適時間「走甜」，佢話庫房嘅錢屬於全港市民，應該用得其所，分畀有需要嘅人。
施榮懷笑言：「財爺派錢唔係人人需要嘅，我就唔需要嘞！」佢提議將錢分予社會弱勢社群，如「三無人士」或低下階層，多協助佢哋就業、提供交通津貼、子女書簿費津貼等，相信會更有意義喎。
卓妮