電單車剷上行人路泊車
電單車剷上行人路兼違例停泊，無視途人安全！在長沙灣工作的陳小姐發現，長順街一幢工業大廈門外長期有電單車違規剷上行人路，並停泊大廈門外，由於該大廈毗鄰港鐵荔枝角站，平日行人如鯽，對途人安全構成威脅，「行人路係畀人行，將人車分隔，依家啲電單車當正行人路係馬路咁，仲成世界嘅？」
警方發言人指出，去年對上址違例停泊車輛發出逾三百六十張告票，強調會繼續留意有關情況並採取適當執法行動，以保持道路暢順。
「日日食飯經過都仲係，四、五部電單車就咁剷上行人路泊車，唔小心畀佢撞親真係可大可小！」陳小姐要求警方加強執法，以杜絕電單車駛上行人路及違規停泊情況。