環保斗係乜東東？就係嗰種擺放路邊專門收集廢物嘅大箱，你可以形容為超級巨型嘅垃圾桶，收集嘅廢物包括建築材料以及殘舊傢俬。環保斗當然有存在嘅必要，正如家家戶戶都需要垃圾桶，之不過問題係，假如環保斗阻頭阻勢阻礙交通，點算好呢？正常人家都唔會將垃圾桶放喺走廊正中央啦。
好衰唔衰喎，香港有好多隨處亂放嘅環保斗，一來有阻住地球轉之嫌，二來裏面存放嘅垃圾有機會構成衞生問題。既然係咁，特區政府嘅相關部門當然責無旁貸啦，必須好好監管，唔容許環保斗擺到亂七八糟。跟住落嚟就要問，相關部門即係乜嘢部門呀？不如睇睇立法會政府帳目委員會點樣講。
早前審計報告批評政府多個部門處理放喺路邊嘅環保斗時推卸責任，立法會帳委會尋日發表報告，狠批當局十幾年來未有處理呢個問題，對此感到震驚以及強烈不滿。
根據帳委會報告，早於二○○一年警方已建議設立制度，規管環保斗放置情況，到咗○七年，業界及政府亦普遍支持引入准許證制度，但有關建議至今未有落實。地政總署認為環保斗屬於道路管理，運輸署就認為係地政問題，即係話，相關部門互相推來推去，帳委會認為咁嘅推諉卸責漠視公眾安全。
立法會用到震驚以及強烈不滿嘅字眼，反映港府官僚作風係幾咁令人反感。講真吖，環保斗冇監冇管，真係好易出事，車又難行，人又難過，出出入入諸多阻滯，長期擺放造成嘅滋擾簡直係神憎鬼厭。
由於政府部門迴避責任又毫無悔意，帳委會促請政府成立聯合工作小組，由發展局、環境局同運房局參與討論，妥善解決環保斗問題。嗱，希望相關部門唔好再卸膊啦。
除咗環保斗之外，就審計報告批評政府拖延檢討私人遊樂場契約，帳委會認為，政府去年九月先至開始檢討私人遊樂場地契約政策係不可接受，當局難辭其咎。簡單咁講，官僚後知後覺，檢討實在太遲。正如議員話齋，政府未殺到埋身都唔檢討政策係非常不恰當，又冇宣傳私人體育會所其實有部分設施可供公眾使用。帳委會促請當局盡快制訂指引，協助私人體育會匯報開放設施嘅情況，並且要設立機制核實資料。
其實講來講去就係官僚作風累事，可以唔做就唔做，就算要做都遲做。計功夫茶話齋，衙門就好比環保斗，裝滿垃圾又阻碇，如果要路路暢通，最好就係將所有人形垃圾送去堆填區！