《明報》最近因撤換總編輯一事搞到滿城風雨，最新連商業電台也陷入內亂。繼陳志雲前日自爆卸任商台行政總裁，轉任新設嘅首席智囊一職後，商台昨日再宣布解僱節目主持人李慧玲，一連兩日出現人事變動，認真立立亂。依家商台亂局已呈現眼前，唔知李慧玲會選擇和平分手，定係死要商台解釋到底呢？
李慧玲被商台解僱事前未有風聲，立法會議員涂謹申透露昨日同李慧玲共進午餐，當時未見李有任何異樣，言談間仲講及日後節目打算請咩嘉賓出席。不過及至下午時分，商台突然向員工發出通告宣布終止聘請李慧玲，有傳佢唔使再返公司，有人代為執拾公司物品，而咁啱得咁蹺，李慧玲昨晚節目因要直播賽馬而讓路，佢連向聽眾講聲再見嘅機會都冇埋。
有泛民主派議員聽聞商台即時炒李慧玲，導火線係佢突然透過個別傳媒炮轟陳志雲過去兩年在商台「有破壞無建設」，但呢個講法係咪屬實，就只有商台高層至知喇。商台外事務部發言人回應話：「君子相分，不出惡言」，不會就有關事件作任何評論。
商務及經濟發展局局長蘇錦樑就話，尊重廣播機構編輯自由和言論自由，唔會干預編輯方針和日常運作，所以不宜評論有關事件。