區議會議席頻頻出現空缺要補選，先有南區區議員馮煒光因為加入政府出任新聞統籌專員，後有東涌區議員林悅行使虛假文件申請按揭貸款被判監。東區區議會過埋今日大會好大機會都出現議席空缺，事關民主黨南豐區議員梁淑楨因嚴重中風連續缺席多次區議會會議，區議會喺去年十月初舉行閉門商討，決定唔再接納梁淑楨嘅請假申請。
根據《區議會條例》，區議員如果未得到區議會同意而連續兩次缺席區議會大會，就會即時喪失議員資格，意味該選區將要進行補選。梁淑楨已缺席去年十二月舉行嘅區議會大會，換句話講，如果佢再唔現身今日嘅大會，民政事務總署就會宣布議席空缺，並啟動補選程序。
其實自從梁淑楨去年初嚴重中風後，各大政黨不斷「插手」當區事務，早前某國際學校興建新校舍，幾乎所有立法會議員都落去該區會見居民，群起反對興建國際學校嘅建議。據聞建制同泛民主派已經協調好參選名單，民主黨會派出梁淑楨助理張國昌頂上，而建制派則有意派出東區區議會主席黃建彬助理李清霞應戰，人民力量都話會考慮加入戰團，睇嚟到時又會好戲連場喇。