政情： 離港大「立」 心搵筍工

逾卅箱物件放校內須整理

徐校長提出嘅搵工四大條件，分別係唔使負咁大責任、酬勞有番咁上下、提供住屋津貼、同埋要做得開心。徐校長笑笑口話，唔係唔想負責任，只係唔想再咁辛苦啫，至於人工當然愈高愈好啦，住屋對佢嚟講就更加重要，事關佢一直以來都住喺港大校長宿舍，無喺香港置業，若然份工冇提供住屋津貼，佢就要自己用一大筆錢租屋，咁就相當唔划算喇。至於做得開心就好簡單啦，佢一定要對份工有興趣，最好閒時仲可以約朋友出來聚一聚。

雖然要搵一份咁筍嘅工唔容易，但徐校長透露，已經有唔少機構向佢招手，但佢話所有事都要等四月一日先至慢慢傾，現階段要先「執垃圾」。原來佢○二年由加拿大返港出任港大校長時，連三十幾年前有關基因圖譜嘅研究結果都帶埋嚟，之後一直存放喺士多房，近期數數吓發現原來有成三十幾箱雜物，當中包括佢第一本日記、小學「見紅」成績表、紀念冊等等，搬離港大前一定要先處理好呢手尾，冇用嘅嘢就要丟棄。

唔覺「八一八事件」係遺憾

臨別在即，徐校長話，唔覺得八一八事件係個遺憾，因為大學有好多唔同嘅聲音，最重要係維護學術自由，呢樣亦係佢一直以來堅守嘅原則。做咗港大校長咁多年，佢最唔捨得係同事、校友同各界朋友，至於自己做得好唔好，就由大家評分喎。

除咗港大團拜外，港大醫學院尋日都舉行春茗酒會，一樣人頭湧湧逼滿賓客，久未露面嘅前衞生防護中心總監曾浩輝都畀面出席，屬馬嘅佢今年犯太歲，佢講笑話今年不宜有大變動，唔好教書住，最好繼續驛馬星動環遊世界，同朋友夾吓band咁，頂多幫阿爸阿媽打吓雜。為咗買個平安，佢仲一早去咗黃大仙祠攝太歲，希望今年順順利利，估唔到佢讀醫科都咁信風水命理喎。