政情：中環出更：新民公記「閃婚」 記招蝦碌
新民黨同公民力量（公記）尋日終於完成「閃婚」，兩大政團正式宣布結盟，除咗沙田區議員龐愛蘭同立法會議員林大輝外，所有公記成員都加入新民黨。突然之間多十九位區議員入黨，黨主席葉劉淑儀即時發表大計，話希望該黨日後區區都有議席，但係咪鋪路選特首，佢就話係言之尚早喎。
新民黨本身已有十二名區議員，兩政團結盟後，總共增加到三十一名區議員，絕對有資格問鼎超級區議會議席，本身兼任荃灣區議員嘅田北辰就話係咪選超級，要問過自己區嘅選民先喎。既然尋日係結盟大日子，公記都好畀面，派咗十幾人出席撐場，新民黨正副主席當然有到啦，但另一位黨副主席鄭承隆就全程冇影，聽聞佢寧願飛去外地旅行都唔出席，葉太坦言對鄭承隆心淡。
羅光強鄧永昌名牌「升呢」
今次兩黨「閃婚」好順利，但開記者會時就有少少蝦碌，公記兩位區議員羅光強同鄧永昌嘅名牌突然「升呢」，變咗做沙田區議會副主席，睇嚟新民黨仲未搞得清楚公記啲新成員背景喎！
卓妮