政情：中環出更：廠商會換屆逐鹿出奇招
中華廠商聯合會下半年就換屆，令今年新春團拜同春茗變成前哨戰場合。有意競逐會長嘅副會長李秀恒（Eddy）及顏吳餘英各出奇謀拉票，兩人均連趕兩場團拜及春茗，並公開表態角逐會長一職。顏太自爆已展開拉票工作，仲使出冧招，提早向各會董送上一籃人手製朱古力，希望大家情人節甜甜蜜蜜。Eddy就以誠意搭夠，早前出動靚相機親自為每一位會董影沙龍照，連埋執相總共用咗幾百小時。
顏太前日一身紅噹噹出席團拜，見佢留足全程，一見商會元老級前輩如福建幫楊孫西等人，就主動上前恭賀拜年，又積極四出同各會董打招呼，但未見佢明確開聲拉票。不過，顏太就向卓妮表明心迹，坦言好想做會長，希望憑個人經驗為廠商會及工業界出分力，希望爭取到有權投票嘅百位會董支持。佢認為自己嘅優勢係親和力，相信女性亦有能力當上會長之位。
至於同場嘅另一會長熱門人選Eddy，都係忙於同班會董朋友打招呼。提到競逐會長，Eddy都話：「我當然好想做啦，不過我才幹一般啫！」雖然佢咁謙虛，但不忘推銷自己話：「我加入廠商會二十二年，做會董都做咗十八年，副會長又做咗三屆，既然第一副會長陳淑玲無意做，我身為第二副會長，都應該考慮吓我啦！」不過，佢否認自己係有野心之人，坦言喺商會咁耐，要爭就一早爭咗啦！
第一副會長陳淑玲唔選
原本下屆會長理應由第一副會長陳淑玲（Shirley）接棒，但佢突然讓賢令選情變得多變，點解佢唔出選呢？原來前年佢囝囝因突發心律失常死亡綜合症（SADS）不幸離世，事件令佢備受打擊。走出傷痛後，Shirley創辦了「遺傳性心律基金會」，希望用多啲時間做善事，提升公眾及醫界對SADS嘅意識。至於佢會撐邊個做會長，Shirley話商會個個獨當一面，邊個當選都係為社會做事，最緊要大家團結開心！
卓妮