曾俊華作為前朝遺臣，繼續擔任現屆政府財政司司長，一直以來都有一個深入民心嘅形象，就係一個餐餐計錯數嘅守財奴
。呢個講法唔止深入民心，不少達官貴人都有同感，當中包括不同陣營嘅大商家。勢估唔到嘅係，曾俊華原來臉皮好鬼死厚，無論你點樣話佢係孤寒成性嘅守財奴，財爺本色依然故我繼續一味守財，坐擁豐厚盈餘仍然死都要撳住個荷包。
鬍鬚曾將於二月二十六日發表最新一份《財政預算案》，不久前佢喺網誌整咗一篇「事先張揚的減甜宣言」，聲稱未來會逐步取消派糖措施。根據佢嘅講法，派糖作為一次性措施係反經濟周期嘅財政策略，以及外圍經濟不穩嘅防禦措施，當外圍經濟漸漸穩定下來之後，必須逐步取消相關措施。曾俊華網誌係咁講：「從現時的情況看來，這一天應該很快出現。」
具體嘅減甜方案又係點嘅呢？有消息話，最新一份《財政預算案》有三項派糖措施會有顯著減幅，差餉寬免未必全年都有，公屋可能由現時免租兩個月削減至一個月，未來甚至有機會全面撤銷，持續多年每戶一千八百元嘅電費補貼亦會削減。之不過咁，其他針對基層嘅措施，例如綜援同生果金出雙糧，鬍鬚曾傾向保留。至於上班一族最關心嘅退還薪俸稅又點呢？聽講會繼續保留呢一項惠及中產階級嘅派糖措施，但係退還金額未有最後定案。
即係咁，舊年派糖措施涉及三百三十億元，今年會勁削三至四成，就算仍然派糖都只係少甜。
冇錯，特首梁振英喺《施政報告》大手推出扶貧政策，要用相當大筆嘅錢，作為管理財政嘅大掌櫃係應該睇住盤數做人。之不過咁喎，扶貧之餘仲要紓困，庫房唔係冇錢，反而係盈餘多到水浸咁滯，鬍鬚曾點解唔可以維持派糖措施嘅甜度呢？唔計以往儲埋儲埋嘅財政儲備，淨係以本年度財政盈餘計算吖，估計會有超過三百億元，甚至有機會高達五百億，以咁雄厚嘅財力，點都可以應付同舊年相若嘅惠民開支啦，係咪咁話呀！
若然講到整體嘅財政儲備，庫房家陣有超過七千億元，足夠政府喺完全冇收入嘅情況之下運作二十三個月。喂，一座全球知名嘅國際大都會有乜可能二十三個月完全冇收入呀？如果呢個情況真係發生，如無意外係世界末日，全人類死清光嗰隻。萬一係世界末日，你留低幾多錢都冇用啦，倒不如及早派晒畀市民食餐好嘅，死都要做隻飽鬼吖嘛。
雖然曾俊華似乎已經立志穩站守財奴崗位，不過功夫茶都要盡最後一番努力強烈呼籲，預算案唔好減甜呀，唔該！