南區區議會海怡西補選提名期已展開，早前放風話要參選嘅人民力量袁彌明（Erica）尋日終於報名，佢公開向選民承諾，唔會好似原議員馮煒光（Andrew）咁將選民「用完即棄」、「出軌」投靠政府，會「從一而終」完成任期。玩到咁大，已參選嘅新民黨陳家珮都唔敢怠慢，話已經當自己「嫁入」海怡西，選民想佢宣誓唔過檔都冇問題喎。至於「積極考慮參選」嘅民主黨單仲偕就話，政府根本冇可能搵佢過檔，所以冇需要發誓。原來承諾完成議員任期咁基本嘅要求都可以當成賣點，真係得啖笑。
