政情：梁錦松發表「競選政綱」？
二○一四至一五年度財政預算案，仲有兩星期先至正式發表，但前財政司司長梁錦松（阿松）尋日就搶閘發表咗一篇疑似預算案嘅演辭，大談香港賴以成功嘅自由經濟同「大市場、小政府」哲學、政府角色同與企業嘅關係，以至佢當年大搞教育改革、做財爺期間成功滅赤嘅功績等，聽落唔止似預算案，直頭似一份施政報告甚至競選政綱呀！佢之前唔係話過無意參選特首嘅咩？
內地官方媒體尋日發稿，報道阿松以南豐行政總裁身份，喺黑龍江「亞布力中國企業家論壇」第十四屆年會上發表演說。演講主題原本係市場經濟對比計劃經濟嘅好處，理應以內地改革開放經驗為主，但阿松講咗無耐就開始離題，轉為大談香港政經情況。
阿松強調，自由經濟係香港賴以成功之道，但同時指港英時代嘅放任自由同無為而治亦未必係最好，佢做財爺時提出政府要做「積極的促進者」就最好嘞！佢又重提自己剛做財爺時，政府開支爆晒標，於是佢就決心「砍了」好多不必要嘅開支等。阿松連自己做教統會主席年代嘅陳年舊事都提埋，話「我領導的教育改革」，為香港培訓咗唔少人才，引入直資制度令中小學敢於創新。不過，佢就無提到自己當年喺負資產同沙士肆虐下滅赤搞到怨聲載道，以及教改引發反彈同依家直資學校屢爆醜聞嘅事件。