政情：鄉新夾擊 田少搵碇匿
距離下屆立法會選舉仲有兩年幾時間，各政黨已經陸續部署。新民黨同公民力量（公記）今日會正式宣布結盟，而鄉議局又言之鑿鑿話組成「新界黨」，面對兩路兵力夾擊，上屆僅僅夠票入局嘅自由黨田北俊（田少），雖然口講就話未驚過，但原來佢一早諗定後路，隨時空降香港島參選。不過，該黨劉健儀喺今屆選舉空降香港島已一嘗滑鐵盧滋味，唔通田少唔怕重蹈覆轍，令議員生涯劃上句號？
再戰新東隨時出局
新一輪政黨整合潮已經展開，新民黨特別會員大會尋晚正式通過同公記結盟，兩政團黨員資格「互認」，新民黨主席葉劉淑儀仲做埋公記會長，而公記潘國山就做新民黨副主席，絕對稱得上「水乳交融」。之前有傳兩黨結盟後，新民黨副主席田北辰（田二少）會從新界西轉戰新界東，但田二少就私下同人講「親情重要啲」，唔會去新界東同大佬田少互撼，反而心思思想試選超級區議會議席。
雖然田氏家族唔使內鬥，但鄉議局最近籌備組黨，事實上已對田少步步進逼，始終田少今屆選舉都係靠上水鄉事委員會主席侯志強過票。田少估計，鄉事派喺新界東最多有一萬五千票，而佢最多只會被撬走佢二、三千票，但鄉事派同樣會撬走民建聯、工聯會嘅鐵票，到時大家票源齊齊分薄，比例代表制下無話邊個唔着數，反而有可能益咗泛民主派。不過，田少咪忘記，民建聯兩條隊都過四萬票，就算唔見幾千票都夠贏有凸，但佢唔見幾千票就隨時玩完喇。
謀空降港島執死雞
面對左右夾擊，田少都諗定「Plan B」，佢講明積極考慮空降香港島，事關要同時走勻全個新界東一啲都唔簡單，而香港島選區就細好多，佢又住正喺山頂，去邊都非常方便。其實空降香港島呢個講法，除咗田少外，連九龍東議員謝偉俊都傳過。歸根究柢，大家都估計葉劉淑儀棄選立法會，集中精力部署二○一七特首選舉，屆時香港島缺乏中產代言人，田少同謝偉俊就諗住執死雞，但啲死雞真係咁易執咩？