中環出更：畀雷劈過 陳永棋又遇地震巨浪
去年遊意大利西西里被雷劈中卻大難不死嘅全國政協常委陳永棋，日前出門再度遇險，今次係遇上地震，地點喺新西蘭首都威靈頓。話說新春前佢同太太登上遊輪，遊覽新西蘭及澳洲悉尼，誰知抵達威靈頓上岸觀光，遇上六級地震，大廈不停搖晃，幸好兩人安然登回船上，但又遭遇六呎巨浪，驚險一浪接一浪，真係個膽細啲都嚇死。
返港又仆親扭傷
陳永棋尋日出席中華廠商聯合會新春團拜，憶述劫後餘生經歷時，仍然好肉緊。佢話威靈頓向來好寧靜，冇諗過會發生地震，好彩搖晃僅持續咗幾秒，有驚無險。定過神來後，佢返遊輪抖抖定驚，誰不知更驚險嘅「節目」在後頭，當遊輪由新西蘭駛往悉尼，途經塔斯曼尼亞時卻翻起巨浪，嚇到佢唔敢登上舺板四日，無癮到極。
所謂禍不單行，當陳永棋平安返港後，前日喺公司做嘢時又不慎喺樓梯跣倒，扭傷右腳，尋日出席團拜時都要戙住拐杖，行路拐吓拐吓。咁黑仔，佢都話好邪，期望馬年否極泰來，萬事大吉。
卓妮