政情：孫大倫三代同堂 團拜「競紅」
年十五未過，拜年未算遲。中港照相器材集團主席孫大倫（Dennis）尋日相約大仔、新抱及孫女，三代同堂齊吃飯。孫家上下「鬥紅」，Dennis帶頭着橙紅色恤衫，孫太就圍上紅頸巾，襯埋紅色名牌袋，洋溢新年氣氛。大新抱鍾婉琪都穿上紅色樽領衫，兩個孫女唔執輸，以紅褲搶晒鏡。最低調，反而係大仔孫道弘，佢拒絕做「利是封」，以黑褸襯牛仔褲，我行我素。
Dennis與家人中午去到灣仔一間富豪飯堂，一到場就向酒樓員工大派利是。剛由澳洲返港嘅鍾婉琪話，專登着得紅噹噹，同老爺、奶奶拜年，咁識做，果然係好新抱。難得同孫女飲茶，Dennis夫婦冧到極，孫太堅持幫手抱孫，等新抱輕鬆啲。孫家上下樂融融，只差新婚嘅細仔孫道熙夫婦，原來兩口子去咗歐洲度蜜月，尋訪北極光，三月頭先返。雖然新春少咗細仔，Dennis同太太湊孫為樂，一樣開心。