《明報》近年報道頻頻出錯，但仲死攬住「公信第一」招牌唔放，幾個月前終於因為某大學調查結果而自我拆走報頭上「公信第一」四字。雖然編輯部揚言會努力重奪「公信第一」名銜，但該報尋日又爆出一大笑話，就係將民主黨總幹事林卓廷（阿廷）嘅「廷」字寫為「延」字，又將佢呢位「前廉署調查主任」寫成「廉政專員」，搞到連阿廷都要喺社交網站暗寸《明報》報道粗疏。
《明報》其實多次出錯，不時錯完又更正，道完歉又錯過。尋日《明報》報道再被人發現出錯，阿廷喺社交網站話，《明報》記者將佢個名誤寫為林卓「延」，仲將佢賦予「廉政專員」呢個職銜，錯得實在太離譜。
除此以外，《明報》仲錯誤引述阿廷嘅言論，將「較少情況需要佩槍」寫成「較少情況需要開槍」，搞到外界以為喺廉署擔任調查員，要好似警察咁要開槍。
阿廷做咗「廉政專員」，佢啲朋友喺網上同佢開玩笑，回應佢話「失敬，失敬」。