政情：工記搵超級接班王
現時政壇中人集中討論政改發展，但都唔會忘記為下屆立法會選舉做好準備，因為最終無論提名委員會點樣組成，立法會議員對下屆特首入閘人選都有舉足輕重嘅影響，絕對不容忽視。為咗喺一六年嘅立法會選舉搶得最多議席，各黨都不敢怠慢，紛紛展開部署工作。當中尤以工聯會（工記）最為着緊，皆因佢哋嘅榮譽會長陳婉嫻（嫻姐）到時已經七十歲，分分鐘退休唔玩，要搵定人接班。近來有消息話王國興（阿王）可能走出港島，接嫻姐棒轉戰超級議席，先幫工記保住一席。
做咗多年東區區議員嘅阿王喺○四年自動當選為立法會勞工界議員，○八年改去新界西參選，成功循地區直選再次當選為立法會議員。一二年，工記改派新人麥美娟出選新界西，阿王就重投港島區懷抱，最後有驚無險以四千票之差擊敗公民黨陳淑莊，以港島尾席連任立法會議員。
讓路郭偉強 衝出港島？
阿王一二年喺港島咁驚險嘅情況下都當選，可見佢嘅實力。工記有個不成文規定，勞工界議員最多只可以做一屆，之後就要落地區接受選舉洗禮，所以該黨嘅鄧家彪同郭偉強就要盡快諗定後路。郭偉強跟阿王從事地區工作多年，阿王喺○七年區議會選舉更放棄東區區議員議席，改為推薦郭偉強參選，如今郭偉強不斷喺港島區經營，如果最後工記真係決定搵郭偉強出選港島，阿王就惟有再度轉區，甚至疊埋心水選超級議席。
話新人輩出 係件好事
不過面對前路茫茫，阿王尋日舉行新春團拜時仍然氣定神閒，話自己會做好現屆工作，遲吓先諗下屆去向。被問到點睇郭偉強出選港島，佢話想工記愈來愈多新人出選地區，咁樣對成個黨嘅發展都係件好事。不過如果阿王選超級議席，佢首先要搵個位選番個區議員，因為選超級議席嘅條件，就要係區議員。
鄉議局近日宣布有意組新界黨，阿王就話鄉議局喺過往幾屆選舉都係幫人抬轎，如今決定旗幟鮮明咁去組黨都係無可厚非，又話新界人組黨參選，對工記無實際影響。