中環出更：名人細心揀郵輪免被蹂躪
香港發生首宗「佔領郵輪」事件，成為城中熱話。前日唔少城中名人趁周末到沙田馬場輕鬆吓，保良局主席鄭錦鐘（Eric）、香港工業總會青委副主席劉燊濤（Gary）等人講起搭郵輪貼士，個個都有一本獨家秘笈。打算退休後同太太搭郵輪歎世界嘅Gary爸爸工總主席劉展灝（Stanley）就話，今次事件學到唔少嘢，可供日後參考喎！
Eric搭郵輪未遇過不愉快事件，佢嘅心得係要睇船員同乘客嘅比例。佢話試過搭只有二百名乘客嘅郵輪，旅客與船員嘅比例係一比一，亦曾經坐過六千幾人嘅大郵輪，平均一名船員服侍三名旅客，兩者比例都適當，旅程亦好愉快。
齊分享乘搭貼士
Gary同太太吳奕筠（Daphne）去年八月亦曾搭郵輪暢遊北歐，咁啱就係參加今次出事嘅美麗華旅遊。有多次搭郵輪經驗嘅Daphne分享「三部曲」獨家貼士，首先係決定一間有口碑嘅郵輪公司，然後選擇啱心水行程，最後先至決定跟邊間旅行社。同場嘅Stanley就話平時好忙，邊有時間坐郵輪歎世界，所以打算退休後先享受人生，今次事件令佢上咗寶貴一課，原來搭郵輪要小心揀選，唔可以馬虎。
杜振源榮升爺爺
卓妮轉頭見到國際小母牛香港分會籌款委員會主席「快勞夾大王 」杜振源（Simon），佢報喜話，大仔杜擴業及新抱Vivian幫佢添咗個寶貝孫女，仲揀正踏入馬年首日，即年初五立春嗰日搶閘出世，孫女已改名叫杜月澄。首次榮升爺爺嘅Simon講起喜事笑不攏嘴，真係戥佢開心。
卓妮