糖水舖霸道 行人好牙煙
「間舖都唔係開咗好耐，但就成日都將啲枱椅放晒喺行人路，霸咗成一半路，搞到行都冇路行！」陳小姐指大埔安泰路有糖水店舖每晚門庭若市，為招徠生意而將大量枱椅置於行人路經營，「有時啲職員仲拎住熱辣辣嘅糖水行嚟行去，真係好牙煙！」
食環署：接獲四宗投訴
食環署發言人證實，由去年十一月至今已接獲四宗有關投訴，經派員巡查後發現有關食肆將桌椅擺放行人路上，對行人構成阻礙，已向食肆負責人提出檢控。
「三個月唔夠就有四宗投訴，食環署好應該睇緊啲！」陳小姐認為店舖開業未幾即有阻街情況，要求當局加強巡查及執法，以免情況繼續惡化，「我都明白舖頭係想做多啲生意，但都要畀番條路人哋行吓！」