政情：百仁慈善跑 副主席瞓身
百仁基金將於下個月舉行慈善跑步，幫香港盲人體育總會籌款。百仁基金副主席顏志永（Roger）、陳稼晉同羅詠詩（Anthea）日前拍住上為活動瞓身宣傳，各人亦早有準備落場為慈善而跑。
顏志永一家三口參賽
Roger話，一早就同太太及囝囝報咗名，一齊參加三公里親子組。佢哋去年已經參加過一次，不過當時囝囝仲細，要推住架BB車行，所以跑咗一公里就放棄。今年囝囝可以拖住行，加上太太有打開網球，相信今次三公里應該難唔到佢哋。唔知Roger媽媽、中華廠商聯合會副會長顏吳餘英會唔會跑埋一份以示支持呢？
Anthea就話，農曆新年期間拜年活動多，食咗好多嘢，今次慈善跑步正好畀個機會佢操番fit。佢即將開始練跑，亦會叫埋青聯一班兄弟姐妹一齊支持。至於曾經做過機師嘅陳稼晉，體能當然好好，今次唔使點練應該都可以完成賽程喇！