無賴總統果然夠無賴，一次一次不停撩交嗌。提起無賴總統四個字，各位親愛嘅讀者大概已經估到功夫茶講邊個，冇錯嘞，就係當今世上能人所不能、能賴所不賴嘅菲律賓總統阿基諾三世。呢一個無賴總統喎，對於馬尼拉人質事件已經撒賴咗三年有多嘞，到咗家陣依然一副賴皮嘴臉，死都唔肯承擔責任，連一句正式嘅道歉都冇。
為咗替死難者家屬討回一個遲來的公道，特區政府推出首輪制裁措施，昨日開始暫停菲律賓公務及外交免簽證十四天嘅安排。係嘅係嘅係嘅，冇錯冇錯冇錯，制裁措施影響不大，又唔係限制菲傭來港打工，賓賓政權唔會有乜嘢經濟損失，之但係呢個三世祖阿基諾實在太可惡，唔單止繼續拒絕道歉，而且搬出一套狗屁不通嘅歪理狡辯，仲係好大嘅辯，即係狡大辯。佢話喎，冇計劃就人質事件道歉，因為咁樣做會引起法律問題，又話菲律賓人喺中國遇事身亡，中國都冇向對方家屬賠償。
你話係唔係狗屁不通吖？菲律賓人幾時喺中國遇到槍手挾持呀？幾時因為特蠢部隊救援不力而客死異鄉呀？菲律賓人就算喺中國遇事身亡，大不了係撞車之類嘅意外，點可能同人質事件相提並論嘅呢？假如菲律賓人真係由於政府官僚犯錯而喺中國死得不明不白，功夫茶第一個企出嚟要求官老爺道歉啦，呢啲先至叫做幫理不幫親。睇番菲律賓自己嘅調查報告吖，講到明馬尼拉市政府同國家官員都有犯錯，香港人唔係死於意外呀。
除咗臉皮厚到冇朋友之外，阿基諾三世仲要含血噴人，佢接受《紐約時報》訪問話喎，希望國際喺南海爭議之中支持菲律賓。呢個三世祖將中國同二次大戰嘅納粹德國相提並論，話捷克喺二戰前嘅一九三八年，向由希特拉領導嘅納粹德國割讓領土，但仍無法避免被全面侵佔，佢認為西方喺南海島嶼爭議之中應該支持菲律賓，擔心如果向中國讓步，會令情況變本加厲。
簡直豈有此理TMD！一方面唔肯就人質事件道歉，一方面又扮晒叉燒博同情，仲要將中國比喻為納粹德國，無賴總統就唔止無賴咁簡單嘞，事關佢愈來愈無恥！
所以唔好講咁多嘞，一於加強制裁措施啦，制裁到菲律賓舉國上下叫痛為止，否則道歉將會遙遙無期，港人將無法討回公道。正如有立法會議員話齋，香港仍然有牌可打，因為菲律賓擔心香港暫停佢哋嘅旅遊簽證，或者收緊菲傭以外嘅工作簽證，例如海員、表演者等等。計功夫茶話齋，對付壞蛋嘅刑具愈大件愈好，你唔推出更狠更辣嘅制裁逼佢道歉，人哋睬你都傻呀！