愛爾蘭詩人葉慈曾說：「文明是力求控制自己」。不能自制，必然會出現不文明的行為。那麼，廉政又是甚麼？要言之，就是「肅貪」、「倡廉」。前廉政專員貪湯一再被踢爆濫用公帑，完全控制唔到大花筒行為，不能自制，豈能不出現違規違例的行為？這樣的廉政專員又如何負起肅貪倡廉的使命？
貪湯視納稅人嘅錢如糞土，近日又揭發佢喺一一年九月初，豪華晚宴招待三十九國駐港領事，開支失控唔在講，更涉嫌收受利益──接受外交部駐港特派員公署派出嘅五名大廚，帶備廚具親臨廉署餐廳主理晚宴；而社關處就購入五隻總值近八千元嘅名貴酒杯，送大廚作為贈禮！
仲有呀！個晚宴搞到成個超級無敵嘉年華咁款，極盡視聽之娛，且有競酒比賽，勝出獎品係一支價值近兩千元嘅巨型紅酒，阿哥，廉政專員貪湯究竟搞邊瓣o架？
英國人統治香港百多年，功過一言難盡，唯一德政就係成立「廉政公署」，當年港人發出讚嘆，以為可以擺脫「中國人的辦事方式」——飲飲食食、收受禮物嘅陋習！
然而，想不到回歸後，在絕代雙貪嘅「貪貪互動」下，廉政竟愈搞愈喎，愈搞愈有番「中國人的辦事方式」；《華爾街日報》不久前的報告便指出，香港廉潔指數按年急跌一點七分至八十二點三分，二十年來更加累計下跌七點七分，跌幅係十大評分項目之中最大。
政府在施政報告亦屢提及要「加強肅貪工作」，之不過，政府好似完全唔明「法律嘅職責在於確保正義的落實」，貪曾查咗近兩年，屁也沒放一個，咁算係點，不如學古代雅典戰神山上法官的口脗老老實實宣布：「本政府不懂此案，過一百年再查！」至於貪湯，若以「事實為根據，以規例為準繩」，咁都算「冇罪」、「唔係貪」，咁香港睇怕不必要有廉署了！